13.12.2019  
Інфармацыйнае паведамленне

Вызначаны пераможцы рэспубліканскай алімпіяды па фінансавай граматнасці сярод навучэнцаў


Пераможцы штогадовай рэспубліканскай алімпіяды па фінансавай граматнасці сярод навучэнцаў устаноў агульнай сярэдняй адукацыі вызначаны па выніках яе фінальнага этапу, які адбыўся 13 снежня 2019 года ў Нацыянальным банку Рэспублікі Беларусь.

Першае месца заняў Лазар Аляксандр (Гродзенская гарадская гімназія). Пераможца атрымаў дыплом I ступені і планшэт у якасці каштоўнага падарунка. Дыпломам II ступені і смартфонам узнагароджаны Шарамет Іван (сярэдняя школа № 2 г. Смалявічы, Мінская вобл.), дыпломам III ступені і фотаапаратам – Варац Уладзіслаў (Рагозніцкі вучэбна-педагагічны комплекс дзіцячы сад – сярэдняя школа, Мастоўскі раён, Гродзенская вобл.).

Алімпіяда праходзіла ў верасні – снежні бягучага года. У чатырох этапах свае фінансавыя веды праверылі больш за 24 тыс. навучэнцаў 10–11-х класаў з больш як 2 100 устаноў агульнай сярэдняй адукацыі ўсіх рэгіёнаў краіны.

Алімпіяда праводзіцца Нацыянальным банкам і Міністэрствам адукацыі Рэспублікі Беларусь штогод з 2014 года і з'яўляецца адным з найбольш маштабных нацыянальных мерапрыемстваў па павышэнні фінансавай граматнасці. Асноўная яе мэта – папулярызацыя ведаў у галіне фінансаў, фарміраванне ў навучэнцаў практычных навыкаў выкарыстання фінансавых інструментаў, развіццё фінансавай культуры моладзі. Алімпіядныя заданні накіраваны на праверку ведаў па тэмах, без якіх немагчымы разумныя фінансавыя паводзіны ў сучасным грамадстве, – асабістыя фінансы, наяўныя грошы, зберажэнні, запазычанні, лічбавы банкінг, страхаванне, падаткі, інвестыцыі і інш. У тэсты таксама ўключаны задачы на разлікі і вылічэнні, якія тычацца фінансаў.