10.07.2019  
Прэс-рэліз

Вынікі рэалізацыі твінінг-праекта ЕС "Умацаванне патэнцыялу Нацыянальнага банка Рэспублікі Беларусь" падведзены на канферэнцыі ў Мінску


10 ліпеня 2019 года ў Мінску адбылася выніковая канферэнцыя твінінг-праекта "Умацаванне патэнцыялу Нацыянальнага банка Рэспублікі Беларусь", які фінансаваўся Еўрапейскім саюзам. Рэалізацыя праекта ажыццяўлялася на працягу апошніх паўтара года кансорцыумам банкаў: Нямецкім Федэральным банкам, Нацыянальным банкам Польшчы і Банкам Літвы.

Як было адзначана ў час канферэнцыі, у ходзе рэалізацыі праекта паміж яго ўдзельнікамі ўсталяваліся адносіны партнёрства, якія спрыяюць раўнапраўнаму і ўзаемавыгаднаму абмену вопытам. Гэта забяспечыла высокую запатрабаванасць і выкарыстанне вынікаў праекта пры прыняцці кіраўніцкіх рашэнняў Нацыянальным банкам Рэспублікі Беларусь і іншымі дзяржаўнымі органамі краіны.

Адкрываючы канферэнцыю, кіраўнік праекта ад Беларусі намеснік Старшыні Праўлення Нацыянальнага банка Сяргей Калечыц адзначыў: "Сумеснае выкарыстанне экспертнага патэнцыялу Нацыянальнага банка і цэнтральных банкаў краін Еўрапейскага саюза ў рамках твінінг-праекта дазволіла дасягнуць значных практычных вынікаў па пытаннях фінансавай стабільнасці, банкаўскага нагляду, абароны правоў спажыўцоў фінансавых паслуг, плацежнай сістэмы і інфармацыйных тэхналогій, кіравання фінансавымі рызыкамі, камунікацыйнай палітыкі".

"Высока ацэньваючы дасягнутыя вынікі, мы вывучаем магчымасць падрыхтоўкі новага твінінг-праекта з удзелам Нацыянальнага банка», – паведаміў Сяргей Калечыц.

Кіраўнік Прадстаўніцтва Еўрапейскага саюза ў Рэспубліцы Беларусь Пасол Андрэа Віктарын заявіла: "Рада быць сведкам паспяховага завяршэння першага твінінг-праекта ў Беларусі. Праект быў накіраваны на ўмацаванне патэнцыялу Нацыянальнага банка Беларусі ў выкананні ключавых функцый, характэрных для цэнтральнага банка. Больш за год працягвалася супрацоўніцтва ў рамках праекта паміж спецыялістамі краін ЕС і іх беларускімі калегамі, накіраванае на прафесійнае развіццё, вывучэнне перадавога вопыту краін ЕС і яго адаптацыю да ўмоў і патрэб краіны. Спадзяюся, што ў вельмі хуткім часе станоўчыя вынікі праекта ў выглядзе зніжэння інфляцыі, умацавання стабільнасці беларускага рубля, удасканалення банкаўскага нагляду, павышэння надзейнасці плацежнай сістэмы адчуюць у сваім паўсядзённым жыцці ўсё жыхары Беларусі".

Пасол Андрэа Віктарын таксама падкрэсліла, што паспяховая рэалізацыя гэтага праекта паслужыла натхняльным прыкладам для іншых органаў дзяржаўнага кіравання, якія таксама выказалі жаданне і гатоўнасць да супрацоўніцтва з адпаведнымі ўстановамі з краін ЕС. Аб зацікаўленасці ў рэалізацыі твінінг-праектаў заявілі Нацыянальнае кадастравае агенцтва, Міністэрства па надзвычайных сітуацыях, Дзяржаўны пагранічны камітэт, Дзяржаўны мытны камітэт, Нацыянальны статыстычны камітэт.

Член Праўлення Нямецкага Федэральнага банка Бурхард Бальц выказаў надзею на працяг супрацоўніцтва. "Кажучы словамі легендарнага еўрапейскага палітыка Жана Манэ, мы займаемся не выбудоўваннем саюзаў дзяржаў, а навядзеннем мастоў паміж людзьмі. Працягваючы гэтую думку, хацеў бы выказаць надзею на тое, што гэты сумесны твінінг-праект паміж ЕС і Нацыянальным банкам Рэспублікі Беларусь будзе не апошнім", – адзначыў Бурхард Бальц.

Намеснік Старшыні Праўлення Банка Літвы Аста Куніёшы падкрэсліла: "Агульнымі намаганнямі ўсіх удзельнікаў мы дамагліся канкрэтных вынікаў твінінг-праекта. Спадзяюся, што ён будзе спрыяць паспяховай дзейнасці Нацыянальнага банка Рэспублікі Беларусь. Ключавую ролю ў поспеху праекта адыгралі ўзаемная прыхільнасць да яго рэалізацыі, адказнасць, прафесіяналізм і актыўная ўцягнутасць у яго нашых беларускіх калег як на ўзроўні экспертаў, так і на ўзроўні кіраўніцтва".

"Удзел у першым твінінг-праекце ў Рэспубліцы Беларусь для нас вялікі гонар. Лічу, што дасягнутыя праектам вынікі будуць карыснымі для Нацыянальнага банка Рэспублікі Беларусь", – заявіў падчас канферэнцыі член Праўлення Нацыянальнага банка Польшчы Павел Самецкі. "У больш агульным плане хачу выказаць надзею на тое, што гэты праект будзе ўспрыняты органамі ўлады і кіравання Беларусі ў якасці станоўчага прыкладу патэнцыйных выгад твінінг-праектаў", – адзначыў Павел Самецкі.

Твінінг – інструмент Еўрапейскага саюза, накіраваны на падтрымку прамога ўзаемадзеяння паміж дзяржаўнымі органамі краін ЕС і краін-партнёраў, або бенефіцыяраў. Твінінг-праекты накіраваны на сумеснае выкарыстанне экспертнага патэнцыялу органаў дзяржаўнага кіравання краін ЕС і краін-бенефіцыяраў з мэтай дасягнення канкрэтна абумоўленых абавязковых практычных вынікаў праз рэалізацыю мерапрыемстваў на падставе раўнапраўнага супрацоўніцтва.

Нацыянальны банк стаў першым дзяржаўным органам Рэспублікі Беларусь, які ўзяў удзел у рэалізацыі праекта "Твінінг".

Кантракт твінінг-праекта "Умацаванне патэнцыялу Нацыянальнага банка Рэспублікі Беларусь" быў падпісаны 22 снежня 2017 года. Бюджэт праекта склаў 1,15 млн. еўра.

Рэалізацыя твінінг-праекта вялася па шасці асноўных кампанентах, па кожным з якіх былі дасягнуты канкрэтныя вынікі.

Так, галоўнымі вынікамі рэалізацыі кампанента 1 "Плацежныя сістэмы" стала распрацоўка праекта Закона Рэспублікі Беларусь "Аб плацежных сістэмах і плацежных паслугах у Рэспубліцы Беларусь", а таксама падрыхтоўка і публікацыя на сайце Нацыянальнага банка публічнай версіі гадавой справаздачы па наглядзе (аверсайце) за плацежнай сістэмай Рэспублікі Беларусь.

У рамках рэалізацыі кампанента 2 "Фінансавая стабільнасць" распрацаваны Канцэпцыя развіцця патэнцыялу Нацыянальнага банка па забеспячэнні фінансавай стабільнасці і ажыццяўленні макрапрудэнцыяльнай палітыкі, а таксама праект Указа Прэзідэнта Рэспублікі Беларусь, які прадугледжвае прававое замацаванне асноўных падыходаў да забеспячэння фінансавай стабільнасці ў краіне.

Па выніках рэалізацыі кампанента 3 "Банкаўскі нагляд" Нацыянальным банкам укаранёны сучасны інструментарый банкаўскага нагляду, распрацавана метадалогія правядзення агульнай нагляднай ацэнкі (SREP) і сфарміравана сістэма індыкатараў ранняга папярэджання.

У рамках кампанента 4 "Упраўленне фінансавымі рызыкамі" праведзены комплексны аналіз сістэмы кіравання фінансавымі рызыкамі ў Нацыянальным банку, выпрацаваны рэкамендацыі і план дзеянняў па далейшым развіцці рызыка-менеджменту. Акрамя гэтага, распрацаваны праект унутранага дакумента, які фарміруе метадалагічную базу кіравання фінансавымі рызыкамі.

У ходзе рэалізацыі кампанента 5 "Абарона правоў спажыўцоў фінансавых паслуг" пры актыўным садзейнічанні экспертаў распрацаваны канцэпцыя сістэмы абароны правоў спажыўцоў фінансавых паслуг у Рэспубліцы Беларусь і стандартызаваная тэрміналогія па найбольш распаўсюджаных банкаўскіх прадуктах, якая дасць магчымасць павысіць празрыстасць і зразумеласць палажэнняў дагавораў для спажыўцоў фінансавых паслуг.

Па выніках рэалізацыі кампанента 6 "Інфармацыйная палітыка" была распрацавана і адобрана Праўленнем Нацыянальнага банка новая Камунікацыйная палітыка, накіраваная на павышэнне ўзроўню даверу да Нацыянальнага банка як дзяржаўнага органа, які рэалізуе адкрытую, паслядоўную і зразумелую палітыку па падтрыманні цэнавай і фінансавай стабільнасці, а таксама ўнутранае Кіраўніцтва па яе рэалізацыі і методыка ацэнкі эфектыўнасці.

За перыяд рэалізацыі праекта адбыліся 67 місій, 3 экспертныя форумы, 3 навучальныя візіты, 2 стажыроўкі, 14 семінараў і 2 круглыя сталы.

З боку краін ЕС у праекце ўзялі ўдзел каля 100 экспертаў.

З боку арганізацыі-бенефіцыяра ў мерапрыемствах праекта ўзялі ўдзел больш за 200 кіраўнікоў і спецыялістаў Нацыянальнага банка, прадстаўнікі органаў дзяржаўнага кіравання, банкаў, банкаўскіх асацыяцый і іншых зацікаўленых арганізацый Рэспублікі Беларусь.